فضفضة

المنبه

2010-03-18T17:48:00.001+02:00

المنبه ، ذلك الجهاز المزعج بكل ما تحمل الكلمة من معنى ، رغم أننا لا نستطيع الإستغناء عنه فى حياتنا اليومية سواء للإستيقاظ للعمل أو الدراسة أو حتى للسفر ... إلخ إلا أنه دائما ما يكون رمزا للإزعاج و ضيفا غير مرغوب فيه لدى الغالبية العظمى ، و رغم تفنن صانعيه فى إنتاج أشكال و تصميمات جذابة منه بأصوات محببة و تقنيات مسلية إلا أنهم لم ينجحوا فى تغيير نظرتنا له
عندما إستيقظت اليوم على هذا الصوت المؤرِّق دارت برأسى بعض الأفكار حول تلك الآلة الصغيرة المزعجة و إن كانت حقا نقمة أم نعمة .. و بعد شوية تفكير فى فترة بين الصحيان و النوم اللى بتنتاب معظمنا كل يوم الصبح لقيت إن كل واحد فينا عنده منبه داخلى خاص جواه بيظهر من وقت للتانى يثبت وجوده ألا و هو الضمير .. سرحت شوية و قلت يا ترى إحنا بنكره الضمير زى ما بنكره المنبه ولا إيه نظرتنا بالظبط ليه ؟
لقيت إن الضمير ده إبن حلال و ساعات كتير بيكون رجل اللحظة الأخيرة و المنقذ من الوقوع فى المحظور ، للأسف إننا فى بعض الأحيان بنعمله إيقاف مؤقت زى ما بنعمل للمنبه تمام و ده ليه ؟ علشان نحظى بلحظة سعادة و راحة زائفة و نعمل اللى نفسنا فيه من غير ما نسمع الصوت المزعج اللى دايما بيهزنا و يخلينا مش عارفين نستمتع بأى حاجة بس الحمد لله إن فى الحالة دى الإيقاف بيبقى مؤقت و يرجع الضمير يشتغل تانى و نحس بتأنيبه القاسى نقوم نندم و نستغفر و نرجع لرشدنا من تانى ، لكن المشكلة بقة لو عملناله إيقاف دائم أو كسرناه خالص فى الحالة دى هنمشى ورا أهوائنا بلا أى رقيب داخلى على أفعالنا و تصرفاتنا و يبدأ الخير ينام جوانا واحدة واحدة من غير ما أى حاجة تصحيه و تفضل أفكارنا و رغباتنا و الظروف المحيطة صاحية و مفنجلة و ينتشر الفساد بصوره تدريجيا
طب ما المنبه إبن ناس أهو سواء داخلى أو خارجى فهو ضرورى لنفيق من سباتنا العميق تارة و من غفلتنا تارة أخرى فيتوازن داخلنا الخير مع الشر و لا يطغى أحدهما على الآخر ، مش عارفة ليه دايما عندى يقين إن أغلب مشاكل الفساد متعلقة بغياب الضمير من أصغر المناصب لأكبرها
رغم إنى صاحية مخنوقة من صوت المنبه إلا إنى خلاص بدأت أحبه و بدأت أحس إنه زى الشمس رغم إزعاجه إلا إنه مفيد جدا و منقدرش نستغنى عنه و على فكرة و الله ما عندى مصنع منبهات

الإنسان

2010-03-18T17:30:00.001+02:00

الإنسان ما هو إلا علامة إستفهام مبهمة و غامضة لا يستطيع أحد فهمه أو تحليله مهما بلغ من علم ؛ فهو مزيج من المشاعر و الأحاسيس و الأفكار المتناقضة بنسب مختلفة و التى ممكن أن تصب فى قالب ربما لا يتناسب فى بعض الأحيان مع هذا المزيج من المتناقضات ، فكم من ملامح وجه شريرة لصاحب قلب من ذهب و كم من ملامح وجه قاسية لصاحب شخصية رومانسية و كم من وجه برىء يحمل بطياته شر دفين ، أى من يحاولون تحليل شخصية الإنسان عن طريق الشكل الخارجى فقط مخطئون و إن أفلحوا فى بعض الأحيان لا أراها إلا إستنتاجات قد تصح عن طريق الصدفة البحتة و بعض تلك الإستنتاجات لن تنطبق إلا على البعض فقط ؛ لأنها تكون تأملات و دراسات على عدد محدود من الأفراد مهما كَثُر عدده فهو ليس العالم بأسره ، فمن وجهة نظرى المتواضعة أنه لا داعى أن يُرهق هؤلاء العلماء أنفسهم بتحليل الشخصيات و محاولة سبر أغوارهم ظنا منهم أنهم سيستطيعوا فهم و لو جزء بسيط مم يدخرونه ، فلتدعوا الخلق للخالق كما هم دون محاولة المساس بأعماقهم فلن تغيروا من طبائعهم شيئا فمن شب على شىء شاب عليه و لن يتغيروا إلا إذا أرادوا ذلك و سعوا إليه . أما عن إدعاء العلماء بأنهم يستطيعون التكهن بم قد يفعله الشخص ، سواء لمنع حدوث جريمة ما أو لمعرفة سبب إرتكاب شخص ما لجريمة معينة فهو ليس إلا مجرد تكهن أى ليس جزما يؤخذ به كحقيقة مؤكدة ، فهناك الكثير من التوائم تمت ولادتهم فى نفس اللحظة بنفس الملامح مع إختلاف تام للشخصيات يصل من النقيض إلى النقيض . ربما إستطاع البعض كشف جزء من الماضى أو الحاضر لكن المستقبل ملك للخالق وحده لا يمكن أن يعبث به مخلوقاته و إن صدفوا

نظارة الحب

2010-03-18T15:32:00.001+02:00

الحب لغة مشتركة بين كل الكائنات الحية ، حرفين يجتمع عليهما و بهما كل من يحمل قلبه بذرة خير و كل من يحمل عقله ذرة رحمة ، فالحب إخاء و إيثار و تراحم و حياة . لا يحتاج الحب عيدا لنحتفل به مع أحبائنا بل يحتاج العيد حبا لكى تسمو أرواحنا ، و مع ذلك ليس هناك مانعا للإحتفال لكن أتمنى ألا نختصر الحب فى يوم واحد بالسنة فلمسة حب من الحين للحين تشعرنا بالأمان و ترسم البهجة و الدفء و الأمان و تدفعنا للإستمرار وسط كل مشاكلنا اليومية . أشكال الحب كثيرة و صوره متعددة و لكنه يصب فى قالب واحد فى النهاية أى تعددت الأشكال و الحب واحد . نظرة إمتنان من حيوانك الأليف ، مسحة يد على رأسك المتعب من والدتك ، كلمة تشجيع من أخيك ، لمسة عطف من طفلك الصغير ، عبارة رومانسية من زوجتك ، سجدة منك لربك ... إلخ كل هذه دلائل الحب الصادق النقى الخالى من أى مصلحة سوى المودة و الألفة و الرحمة . للأسف الشديد مع الضغوط اليومية و أعباء الحياة المتزايدة بدأ الحب يذبل فى تصرفاتنا و أفعالنا و أقوالنا فأفقد الحوار نكهته و بدأ الجفاف يتسرب لحياتنا فى الشارع و منزل العائلة و منزل الزوجية و النادى و المدرسة و العمل .... إلخ
تعالوا نتكلم مصرى شوية و نشوف لقطتين على سبيل المثال لا الحصر مش بعدسة الكاميرا لكن بعدسة العين المجردة اللى حابانا بها ربنا سبحانه و تعالى بكل الحب :
مشهد 1 : شارع مزدحم ، شمس حارقة ، سيارتين لابسين فى بعض ، تجمع من الناس و سائقى السيارتين مش تفتح يا أعمى و إنت إيه ما فيش تمييز مش مديلك إشارة .. و كلمة فى لكمة فى خناقة فى محضر .. إخص
مشهد 1 بنظارة الحب : شارع مزدحم آه برده مزدحم ، أنا قلت نظارة الحب مش خاتم سليمان ، و شمس هية هية و الله بتحرق برده و سبحان الله نفس السيارتين و برده لابسين فى بعض ، هنا بقة دور النظارة ، سائق السيارة نزل راح للسائق التانى ابتسم و قاله انت بخير التانى قاله الحمد لله و ركنوا على جنب و بهدوء اللى له حق ياخده أو يتنازل عن طيب خاطر.
مشهد 2 : منزل مزدحم بالأطفال ، زوجة غير مهتمة بمظهرها ما رضتش أفسر أكتر من كدة لازم أستر على بنات جيلى عِشرة برده ، زوج عائد من العمل شايل طاجن سته ، فين الأكل يا .... ، يوووووووه إنت إيه ماعندكش نظر مش شايفنى تعبانة و عيالك مطلعين عينى .. كلمة فى خناقة فى كام بوكس .. الجيران إتلمت .. طلقنى .. نجوم السما أقربلك .. مش قاعدالك فيها .. الباب يفوت جمل .. إخص
مشهد 2 بنظارة الحب : نفس الأجواء .. الزوج شايل طاجن سته وقع عينه على ست مهندمة إلى حد ما دون مبالغة .. إبتسامة عريضة حمد الله ع السلامة يا حبيبى ... ياه يا حبيبتى أنا واقع م الجوع .. معلش يا حبيبى أنا تعبانة شوية إنهردة ممكن تغرف لنفسك .. ولا يهمك و ألف سلامة عليكى .
ها إيه رأيييييكم ؟؟ أنا مش عايزة أخلى الدنيا غامقة لكن مش بذمتكم بيحصل ؟ و كمان الموضوع بقة ظاهرة عكس زمان اللى مهما كانت عيوبه إلا إن كان فيه حب و مودة و تراحم و إحترام ، مش عايزة أقول إننا وحشين بس ليه ما نكونش أحسن ؟! ليه مانرجعش نرسم تانى حياتنا بريشة حب ، بلمسة رحمة ، بكلمة إحترام ، بنظرة تفاؤل ، بنكهة أمل و يا سلام كمان لو حبة تسامح ، مش هأقول إنى بطلة و قادرة أعمل ده علطول لكن أهو بحاول و مش لازم أنجح كل مرة لكن ع الأقل ما يبقاش كله سلبى يبقى فيه برده حبة إيجابى ، ها شايفين الصورة معايا ؟؟
يا رب المرة الجاية نشوفها بس من غير نظارة الحب اللى إن شاء الله تتحط فى المتحف قريبا جدا

الحب ولا الصالون ؟!

2010-03-18T15:27:00.003+02:00

لن أستطيع الجزم بأن الزواج و الحب علاقتان متناقضتان كما يزعم الكثير من الأدباء و المفكرين ، لكن ربما هما مختلفتان إلى حد ما فليس هناك شرطا أن تؤدى إحداهما إلى الأخرى ؛ فهناك الكثيرون ممن تزوجوا عن قصص حب خيالية ثم لم تنجح زيجاتهم و ربما باءت بالفشل الذريع و إن ظل الحب بينهما فى بعض الحالات ؛ فالزواج مسؤولية قد لا يعيها الكثيرون . و على الجهة الأخرى هناك أيضا العديد ممن تزوجوا ( زواج صالونات ) كما ينعتونه فى مصرنا المحروسة و لاقى زواجهم نجاحا مبهرا و صمد للنهاية .
مع إختلاف وجهات النظر و كثرة الجدل حول أفضلية زواج الحب على زواج الصالونات أم العكس ، مازلت مؤمنة تماما بأن التأنى و حسن التفكير و عدم التسرع فى إتخاذ قرار الزواج مع مراعاة التكافؤ الفكرى و الثقافى و المادى و الدينى و الإجتماعى و الأخذ بالأسباب و الإقتناع التام بالخطوة المقبلين عليها ، هو الحل الأمثل لمعظم الأخطاء التى يقع فيها المحبين بعد الزواج و إعتقادهم بأن الحب وحده يمكن أن يقيم حياة مستقرة ، فيجب أن يدرك الطرفين أن بجانب الزهور وُجدت الأشواك و أنه ليس هناك من بناية تقوم بالأسمنت فقط أو الطوب فقط ؛ فالقليل من كل المكونات لازم لبناء أساس سليم يسهل ترميمه فى المستقبل ... تفتكروا بقة بعد كدة لسة هنقول العيب فى الصالون ولّا فى الحب ؟! إلعبوا غيرها لأن الصالون مظلوم و الحب برىء من كل ما يلصق به من إتهامات ،
العيب دايما فى تسرعنا و عدم رؤيتنا للصورة كاملة من كل الزوايا و ضيق صدورنا بنصائح الغير .
لماذا إذن لا نعيد ترتيب أفكارنا فى أهم مشاريع حياتنا و نأخذ بالأسباب و الآراء المختلفة ثم نعقلها و نتوكل على الله و ليكن ما يكون فيما بعد فهو القدر و النصيب و التوفيق من الله عز و جلّ .
دعونا ننظر للموضوع بصدر رحب و فكر مستنير و ندعنا من الإنشغال بهوامش الأمورعلى حساب الموضوع الرئيسى فليس شاغلنا الشاغل الحب أم الصالون بل الإستقرار و الإستمتاع بحياة هادئة موضوعية أيا كانت وسيلة التعارف فكل الطرق تؤدى إلى روما بس المهم نوصل بالسلامة

الأنتخة مش سر الفخفخة

2010-01-15T21:49:00.005+02:00

صارت " الأنتخة " أى الجلوس دون عمل أى شىء مفيد سمة من سمات هذا العصر و خاصة الشباب سواء على مستوى العمل أو الدراسة أو حتى فى المجالات الترفيهية و أصبحت الغالبية العظمى ترفع شعار الأنتخة سر الفخفخة و تضاءلت أمامها معظم الأنشطة المفيدة بكافة صورها فكريا و بدنيا مم ساهم فى ظهور مجتمع متراخٍ ، سطحى ، مستهلك ، قلما ينتج ما يحتاج إليه .
تعالوا ناخد جولة مع بعض و نشوف هنوصل لإيه :
الجولة الأولى : شفنا شاب متخرج من الجامعة جالس فى غرفة نومه أمام جهاز الكمبيوتر و مقضيها نت و ألعاب و شات و خلافه ، لم يعمل منذ التخرج رغم ان بقاله سنتين لا شغلة و لا مشغلة ، و مصدر دخله الوحيد هو المصروف من الحاج أو الحاجة أو كلاهما هو و شطارته بقة ، و عندما تتحدث معه لتعرف كيف يفكر و ما هى أهدافه و طموحاته تجد الآتى :
س : لماذا لم تعمل حتى الآن ؟
ج : و أنا يعنى هاقطع نفسى ما هو مافيش شغل أعمل إيه أنا يعنى ؟!
س : هل قمت بتقديم أوراقك لدى بعض الشركات أو المصانع أو المكاتب ؟
ج : جربت و بعدين زهقت ما انت عارف الكوسة و حتى لو إشتغلت هايدونى كام يعنى 200 ولّا 300 جنيه دول حتى مايكفونيش مواصلات .
س : طب و ناوى على إيه و هاتفضل كدة لحد إمتى ؟!
ج : مستنى الفرج أو أى حد يعرض عليا شغل كويس بمرتب معقول ولّا يمكن البلية تلعب و حد يجيبلى عقد عمل برة .
ها إيه رأيكم فى كلامه ؟ طبعا كتير منكم هيتعاطف معاه و يضرب كف على كف و ينزل شتيمة فى المسئولين المقصرين ، طب ما تيجوا نبصلها من وجهة نظر تانية إيجابية شوية صحيح فيه صعوبة فى إيجاد فرص عمل مناسبة و المرتبات مش قد كدة ، بس تفتكروا الأنتخة هى الحل ؟!
إيه رأيكم لو نبدأ من تحت الصفر المهم إننا نبدأ بمعنى انت كدة ولّا كدة فاضى و بتاخد مصروفك
من والدك فيها إيه لو تنزل لأى صاحب عمل و تعرض عليه إنك تشتغل عنده ببلاش مقابل شهادة خبرة ماظنش فيه صاحب عمل ممكن يرفض عرض زى ده ، و بكدة هاتكون إستفدت خبرة فى مجالك و خبرة فى التعامل مع الناس و المواقف و كمان شهادة تساعدك فى فرص أحسن للشغل و أكيد ربنا هايكرمك طالما إنك سعيت و عملت إللى تقدر عليه و فى كل الأحوال أكيد ده أحسن من الأنتخة .
الجولة الثانية : لقينا طالب فى أجازة نصف العام مستلقى 24 ساعة أمام الفضائيات و جنبه جردل فشار على كام سندوتش و قلنا ندردش معاه شوية ،
س : ها إيه الأخبار قاعد بتعمل إيه ؟
ج : إسكت ده فيه حتة فيلم أكشن إنما إيه جامد آخر حاجة .
س : طب إيه رأيك تغير جو و تنزل تعمل شوية رياضة فى النادى ؟ و أهو تحرك نفسك
ج : يا عم رياضة إيه بلاش لعب عيال هو فيه أجدع م الأنتخة .
س : طب يا سيدى بلاش ، بقولك إيه ما تقرالك كتاب أو إنزل إتفرج على شوية معالم سياحية ، فكرة حلوة صح ؟
ج : فكك منى بقة الفيلم هايبتدى ده انت قديم قوى
تفتكروا الطالب ده هايوصل لإيه قدام شوية أكيد كلها كام سنة و وزنه يزيد و يبقى شاب سطحى أغلب ثقافته مستوحاة من أفلام أجنبية أغلبها مشوهة فكريا ، و غالبا هايتعثر فى دراسته و يتخرج بالتيلة لينضم لزملائه على قهوة بلدى يلعب طاولة و يندب حظه غير مدرك إنه سبب ما آل إليه ، فهو فاقد كثير من المؤهلات الفكرية و ربما البدنية التى كانت لتساعده فى الحصول على وظيفة مناسبة .
الجولة الثالثة : وجدنا إعلان وظيفة شاغرة كعامل نظافة فى شركة لجمع القمامة و تابعناها فوجدنا مجموعة قليلة من المتقدمين بغير حماسة و بعد إستلام أحدهم الوظيفة كان لنا معه هذا الحوار ،
س : لماذا لا تقوم بمهام عملك الجديد ؟
ج : شوية كدة و هاقوم أعمله .
أعدنا عليه السؤال مرة أخرى بعد ساعة فقام متأففا متمتما ببعض الكلمات غير المسموعة ثم أنجز العمل بتخاذل متبعا مبدأ عُك و لَيِّس كله كويس .
س : لماذا لم تقوم بعملك بإتقان ؟
ج : على قد فلوسكم .
تفتكروا وضع زى ده هيترتب عليه إيه لو كل عمال الشركة إشتغلوا بنفس الطريقة ؟ طبعا خدمات الشركة سواء كمّا أو كيفا هتنخفض و تكون على غير المستوى و مش بعيد تفلس و تقفل و يتشرد كل العمال دول و يدعوا عى صاحب الشركة و الحكومة رغم إن هم السبب و هتضطر الدولة تكلِّف شركات أجنبية و نفضل شعب مستهلك مش بس للمنتجات و لكن كمان للعمالة رغم وفرتها الشديدة لدينا بذمتكم مش عيب علينا ؟
ها لسة هنقول الأنتخة سر الفخفخة بعد شوية الأمثلة الصغيرة دى ، مش عايزة أكون متحاملة عليكم لأنى فى النهاية أكيد زيكم بس قلت نفوق سوا مع بعض من السبات العميق اللى إحنا فيه و نرفع سوا شعار الأنتخة سر التختخة البدنية و الفكرية و أهلا بالنشاط و العمل و الكفاح من أجل حاضر مشرق و مستقبل أفضل

حقى الشرعى فى حبل الغسيل

2009-01-08T20:23:00.004+02:00

صباح الخير عليكوا كان فى مثل بيقول الضرس اللى يوجعنى أخلعه ، و طبعا أكيد اللى قال المثل ده دكتور سنان ربنا مديله الصحة . محسوبتكوا بقى مقضية نص عمرها مع دكاترة السنان و بقت عشرة خلاص ، لكن الشهادة لله برده لسة مش بطيقهم و لسة برتعش زى البطة المبلولة و أنا قاعدة على كرسى الاعتراف بتاعهم ، نفسى أعرف مين المؤذى اللى اخترعه أكيد كان واحد من المخابرات عشان يعذب بيه الأسرى عشان يقّروا بكل حاجة ، نهايته فى الآونة الأخيرة ( حتة فصحى أهى عشان تعرفوا بس انى مش أى كلام:) ) لقيتلكوا ضروسى و سنانى من الآخر كدة الطقم كله ناقح عليا و صداع بقى و بتاع ، قمت اتهفيت فى نفوخى و قلت أروح لدكتور السنان و المرة دى قلت أجرب دكتورة و لو انى مش باعترف انا بشغل الستات مع احترامى يعنى بس قلت أجبر بخاطر بنات جيلى و اهو كله بثوابه نهايته قضيناها بنج و حفر و رزع و بتاع الى ان وصلنا للضرس الميمون اللى الدكتورة أجزمت انه لازمه علاج عصب ، و بعد ما عصّرت على نفسى شوال ليمون و خدنا بتاع شهر و قفلنا الضرس و كله تمام ألاقيلكوا نقح أنقح من نقح و جع العصب ذات نفسه طب و بعدين يا جدعان ايه الحل قالتلك لازم نفك و نشتغل من جديد كام شهر كدة و لو منفعش نخلعه أو نخلعه من دلوقتى و خلاص !!! جه على بالى ساعتها المثل بتاع الضرس اللى يوجعنى أخلعه بس برده افتكرت المثل بتاع حمارتى العارجة و لا سؤال اللئيم ، و خصوصا ان عندى 27 سنة و بتتكلم فى الخلع أمال أما أبقى 60 سنة لو ربنا ادانى العمر هتعمل فيا ايه هتخلع الفك ؟!..... و من بعد ما روَحت من عندها و أنا بدأت أفكر مش بس فى موضوع ضرسى لكن فى حياتى كلها اللى مرّت قدامى أهم أحداثها فى شريط زى بتاع أخبار القناة الأولى كدة و سألت نفسى سؤال يا ترى أنا من الشخصيات اللى بيقولوا عليها شخصية محاربة يعنى بتاخد قراراتها بنفسها كدة و ليها دور فى حياتها و بتقاتل لحد ما توصل للى هى عايزاه و لا أنا شخصية مستسلمة و انهزامية و ماشية مع التيار منيين يشيلنى يشيلنى و منيين يحطنى يحطنى ؟ و بعدين قلت أفتكر كام حدث كدة و أشوف أنا نظامى ايه و أحاول انى أكون من الشخصيات الجامدة المحاربة دى ، المهم افتكرت لحظة التنسيق بتاع الثانوية العامة مجموعى كان يدخلنى تقريبا كل الكليات بس أنا مكنش عندى هدف أو ميل ناحية كلية معينة يمكن شوية ناحية فنون جميلة بس كنت جايبة غير لائق فى امتحان القدرات قلت طب اعلام و صحافة على أساس انى لكاكة بابا قال ما عندناش بنات يروحوا القاهرة لوحدهم قلت طب ايه ؟ قالوا أروح صيدلة ممم مجموعى مكنش يجيب غير صيدلة طنطا ( كأقرب حاجة لاسكندرية يعنى) قلتلهم طب ما هى يعنى زى سفر القاهرة قالوا لا طنطا سنة و هتتنقلى كمان دى بلد محافظة مش زى القاهرة بينى و بينكم أنا استسهلت ان هم اللى ياخدولى القرار و سكوتى و مجاراتى ليهم خلاهم يعتبروا انى موافقة و صراحة العيب فيا أنا مش فيهم ، أنا اللى ما اصرتش على رغبتى، و رحت طنطا و جبت تقدير و اتنقلت أسكندرية و قلت و ماله صيدلة صيدلة و أهو ابقى زى خالتى الوحيدة و أنا بصراحة معجبة بشخصيتها و بتاع و بدل مامسك فرشاه و ألوان أو قلم و ورقة بقيت باشرّح ضفادع و فئران ، الخلاصة انى لقيت انى مشيت على الطريق ده فى حاجات كتير مهمة أو حتى تافهة فى حياتى نظام ارسم لى خط و أنا أمشى عليه ... طب ما دى مصيبة ما معنى كدة انى من الناس بتوع الاستسلام و بعدين يا رجالة هاتصرف ازاى دلوقتى؟ المهم ساعتها كان ورايا غسيل ،أصلى بحب أغسل هدومى فى غسلة لوحدها، بعدين اكتشفت انى بافضل محوشة غسيلى اسبوعبن تلاتة لأن حبل الغسيل علطول مشغول عشان هما بيغسلوا كل يوم قلت أنا لازم أعمل وقفة و أطالب بحقى الشرعى فى حبل الغسيل و لقيت ان الموضوع بسيط و مكنش محتاج أكتر من انى أطالب بالحق ده عشان أخده .... الله طب ما لما الموضوع سهل كدة امال أستسلم ليه بقى ؟! صحيح المثال هايف بس هى مسألة مبدأ لو قدرت أطبقها ع الهايف أكيد هاقدر أطبقها ع اللى مش هايف ( أصلى مش فاكرة عكس كلمة هايف فا مش أنقذتنى:) ) و قلت طيب ادينى خلِصت من موضوع الشخصيات ده و عرفت انى ممكن أكون شخصية مقاتلة أمال بقى موضوع الضرس اللى يوجعنى أخلعه ده ايه حكايته ، هنعمل فيه ايه؟! ممم قعدت أفكر تانى يا ترى لو فى انسان عزيز عليا بس الانسان ده يعنى فيه حبة عيوب بتستفذنى و يا سلام بقى لو طلع حد قريب منى بدرجة متسمحش انى أبعد عنه أو ان تكون بتربطنى بيه صلة قرابة مثلا و فى نفس الوقت أنا مش قادرة أستحمل العيوب دى أو انه يكون جرحنى أو ضايقنى فى حاجة أو بيضايقنى باستمرار مثلا يا ترى هعمل ايه؟ هقول ساعتها الضرس اللى يوجعنى أخلعه و أجيب سكينة و أغُز الشخص ده أو أسيب البلد و أهج و أبعد عنه و لا أحاول معاه مرة و اتنين و مليون انى أفهمه ايه اللى بيضايقنى لحد ما يستجيب و نلاقى حل وسط و ان مكنش ساعتها بقى يا أقبل الوضع كما هو عليه يا اما أخلع ... لقيت انى أكيد هحاول معاه لأن اللى عايز العسل يستحمل قرص النحل ... سبحان الله طب ما الموضوع ماشى زى الفل أهو و ييجى منى برده و ممكن أكون من الشخصيات اللى بتحاول فى الحاجة لحد الآخر و بناء عليه قررت مخلعش ضرسى و مستحملة الألم لحد دلوقتى و شغالة فيه عشان أبقى عملت اللى عليا و اللى يعوزه ربنا فى الآخر يكون و من يومها و أنا بحاول ان يكون لى دور فى حياتى مش بس أمشى على الخط المرسوم لى صحيح مش دايما بانجح بس على الاقل بحاول و ده بيسعدنى جدا و اكتشفت كمان ان كل انسان جواه الشخصيتين الشخصية المحاربة و الشخصية المستسلمة لأ ده مش كدة و بس انما كمان كل انسان حسب الموقف و حسب عوامل تانية بيكون مستسلم و فجأة فى موقف تانى تلاقيه أسد و محارب و ياخد حقه تالت و متلت ، احنا بس اللى مش عارفين القدرات البشرية المهولة اللى ربنا سبحانه و تعالى أنعم بيها علينا و اللى لو احنا استغلناها صح و اتبعنا معاها أوامر ربنا و انتهينا عن نواهيه عشان نقوّم القدرات دى هنبقى أحسن شعوب الأرض ربنا يهدينا دايما و نقدر ننتصر على نفسنا و ساعتها بس هنعرف نرسم الخط اللى هنمشى عليه معلش طولت عليكوا كالعادة ربنا يجعل كلامى خفيف عليكوا و أشوفكوا قريب على خير ان شاء الله .

الحمد لله

2008-12-29T19:27:00.004+02:00

مش عارفة أبدأ منين ولا ازاى بس كل اللى يتقال الحمد لله. الفترة اللى فاتت عليا دى صحيح كانت صعبة بس بجد اتعلمت فيها كتير أو بمعنى أدق اكتشفت كتير. أنا محبتش أكتب الكلام ده باسلوب أدبى أو حتى بكلام مرتب أو أفكار منظمة لكن بكتب اللى ييجى على بالى بنفس الاسلوب و الترتيب من الآخر يعنى اعتبروها فضفضة . فى مثل بيقول اللى يخاف من العفريت يطلعله محسوبتكوا بقه أكتر حاجة تخليها زى الفار المقفوش فى الثلاجة هى الحقن و العمليات و خلافه و عمرى ما تخيلت انى ممكن اخد حقنة فى حياتى لأى سبب بس اللى حصلى بقة خلانى بجد أآمن ان أحسن حاجة تخليك تتغلب على خوفك من أى حاجة هى انك تواجه الحاجة دى و تخوض التجربة مهما كانت صعبة بس بجد من كتر ما هتتعرض للصعوبات هتحس ان كل حاجة سهلة و انك بقيت حر بجد و مفيش حاجة تانى هتخوفك. الحكاية باختصار :) طبعا كلمة اختصار دى ملغية من قاموسى لانى لكاكة جداااااااا نص نص يعنى:) المهم أنا كان عندى آلام فى الزايدة من حوالى عشر سنين و كان المفروض أعمل العملية من زمااااااااااااان بس نظرا لشجاعتى الفائقة فضّلت انى استحمل كل الألم ده ولانيش حد يدينى حقنة و يفتح بطنى و ياخد حته و يرميها ،احساس بشع جداااااااا طبعا الاحساس ده كان العشر سنين اللى فاتو لكن بقة الاحد اللى فات كل ده أصبح فى الفضاء المشمشى آلام رهيبة، تحاليل لأول مرة فى حياتى بُست ايد بتاع التحايل يشوفله صرفة غير حكاية السرنجة السوبر دى بس أبدا تحسوا كدة كان بيتشفى فيا ههههههههههههههه المصيبة أنه أول ما غرز السرنجة بعد ما كنت بعيط سحت على نفسى من الضحك حسيت انى قدام مصاص دماء حاطط شاليموه و عمال يمص فى دمى :) المهم عملت التحاليل و أنا لسة مرعوبة نص نص و خدت بابا جبست له ايده عشان كان فيها شرخ ،متدقوش هى فرّة و جت فى العيلة :) الحمد لله انه بيمتحنا فى الأيام المفترجة دى عشان يغسل ذنوبنا . يوم بقة الاثنين الميمون عملت أشعة دى كوم تانى أشرب 2 لتر مياه و أمسك نفسى و دى بقة عجيبة من عجايب الدنيا ال8 عارفة يا ستى انهم 7 مشيها 8 المهم فضلت ماسكة نفسى لحد ما عيطت و فرجت علينا المستشفى و الناس فكرانى عندى مرض جامد و محسوبتكوا نسيّت الزايدة أصلا و هتموت و تشوف أى حمام . المهم اتعرضت على جراح بليل قال لى لازم عملية حالا أنا بقة انهرت عياط......ضحك........ عياط....... عياط..... عياط... و استسلمت لقضاء الله رحت البيت استوحميت معرفش ازاى أصلا و أخويا حضّر شنطة و خدنى أنا و بابا بالعربية الساعة 12 بعد نصف الليل على المجزرة عفوا المستشفى ماما طبعا كانت منهارة جوزها و بنتها فى ليلة واحدة كانت مزبّهلة و قاعدة تدعى و تكلم خالتى و تعيط . أول ما دخلت المستشفى لقيتلوكوا 2 ستات هجموا عليا بيغيرولى هدومى و يلبسونى البتاعة اللى بيلبسوها فى العمليات و هوب كرسى متحرك و كتّف الزبون يا معلم:)، عالم تانى بجد حاجة ليها رهبة ناس لابسين أخضر أوضة مفهاش الا سرير و لمبة كبيرة الناس ماسكة مشارط و مشمرين أول مرة أحس احساس خروف العيد طبعا محسوبتكوا فى موقف لا تحسد عليه و ديلى فى سنانى و يا فكييييييك انما على مين جبونى من قفايا و هوب البنج و دمتم . الجزء اللى جاى بقة الفوقان من البنج و يا سلام بقة على محسوبتكوا و هى بتفوق حاجة كدة اللى يسمعها يقول سبع رجالة فى بعض بيقولوا قعدت أزعق و أقول انى عايزة أقتل حد و محبش حد يتحكم فيا و انتوا مين انتوا عملتوا فيا ايه (اصلى كنت حاسة انى مخطوفة فى سفينة فضاء هههههه تقولش مارجريت تاتشر) و لما فقت حبة قعدت أقول انتوا كدابين انتوا مشلتوش الزايدة الألم فظيييييييع انتوا نسيتوا فوطة جوة هههههه أصلا الجرح كله 3 سم ميشلش منديل بس أنا بقة فيا صفة زبالة حكاية الوسواس دى ربنا يهدينى واخلص منها. المهم طبعا قبل العملية كان كل الدنيا باللى فيها مش فى بالى و مش برّد على أى حد لا دكاترة ولا حاجة ال على لسانى القرءان و ربنا و بعد ما فقت كلمة سبحان الله فى قلبى بجد و الحمد الله على بالى باستمرار فعلا يحيى العظام و هى رميم أنا فعلا شكلى اتبدل فى الكام يوم دول ،بس الغريبة و أنا فايقة من البنج نص نص و فى عز الألم انى افتكرت بشر مش كتير يمكن 3 أو 5 مش أكتر بس ساعتها حسيت قد ايه ان من كل العالم ده فى ناس بجد بحبهم و بجد حب صادق أنا نفسى يمكن مفهمتش كينونة الحب ده قد ايه قوى كدة غير لما لقيت نفسى بين ادين ربنا و فى عز ضعفى و أنا محبش حد يشوفنى ضعيفة أبدا كان نفسى أوى يكونوا أول ناس أفتح عنيا عليهم طبعا على رأسهم بابا و ماما و أخويا و ناس تانية مقدروش يكونوا موجودين لحظتها يمكن كانوا ميعرفوش بس كان نفسى على الأقل يكونوا حاسين بيا . بس فى المجمل رغم كل الألم و انى لسة حتى مفكتش الغرز و رغم انها تجربة هايفة أوى فى وسط اللى بيحصل و رغم قساوتها عليا الا انى بجد اكتشفت نفسى و اكتشفت اللى حواليا و حتى الناس ال مش قريبين منى أوى لمست لهفتهم و اهتمامهم اللى بجد فضلت اقول الحمد لله مليون مرة على كل اللى ربنا أنعم عليا بيه و رغم انى اتأثرت شوية بناس المفروض قريبين منى حسيت انهم بعدوا أوى بس برده بفضل أوجدلهم الأعذار عشان فعلا بحبهم و لازم أحافظ على صورتهم جوايا. أحلى تعليق سمعتوا كان من جوز خالتى كلمنى و أنا فى المستشفى من السعودية عشان يضحكنى بيقولى اخص بقة أنا اجوز ابنى لواحدة ناقصة زايدة هههههههههههه عجبنى اوى التعليق رغم بساطته انه فعلا فى فى حياتنا حاجات كتيييييييير زايدة و لو نقصت مش هنحس انها كانت موجودة زى ما أكيد فى حاجات بسيطة أوى لو زادت هنبقى فى قمة السعادة . ياااااااااااااااااااه كل دة لت و عجن ده انا هرشتلكوا مخكوا:) معلش بقة استحملوا تخاريف فترة النقاهة.أنا بس كان نفسى أقول لكل حد فى محنة أو عنده مشكلة ان بجد ربنا كبيييييييييير قووووووووووى و حنين قووووووووى و انه ميخافش و مهما ضاقت واتكعبلت بتتفك مرة واحدة و كله بيتظبط بأمر الله سبحانه و تعالى بس احنا نخلى عندنا أمل و ايمان و نعمل اللى علينا و نسيبها على الله . كل سنة و انتوا طيبين يا رب و بالصحة و السلامة و ربنا يمن علينا كلنا بالحب و الخير و السلام و الصحة و العافية و التسامح، الدنيا فعلا مش مستاهلة أكتر من كدة .